Wjele poskitkow na lětušim Budyskim nalěću w Sprjewinym měsće

Budyšin (CS/SN). Tři jewišća a wjele kołowokoło – to je skrótka prajene lětuše Budyske nalěćo. Na jewišćach na Žitnych wikach, na Hłownym torhošću a na Mjasowych wikach wustupja wuměłcy najwšelakorišich hudźbnych žanrow. Nimo toho smědźa so lubowarjo elektroniskeje hudźby na wosebite reje na Butrowych wikach wjeselić. Dohromady postara so 50 programowych dypkow a 500 sobuskutkowacych wot 30. meje hač do 1. junija wo wjele zabawy, zdźělichu zamołwići tele dny na nowinskej rozmołwje.

Budyske nalěćo budźe swjedźeń za wšitke generacije. Njedźelu na Dnju dźěsća maja dźěći w srjedźišću stać. Na Žitnych wikach změja wosebity koncert za małych přihladowarjow. Na Bohatej hasy budźe klawn po puću a na Mjasowych wikach móžeš so šminkować dać. Tam změja tež trampolin a paslensku dróhu, kotruž organizuje zawod Alstom. Na Mjasowych wikach wotměja so njedźelu tež čaporowe wiki.