W dźěłarničce w Slepom wo sonach a pućach do přichoda přemyslowali

Slepo (SN/MiP). Wosebita dźěłarnička pod hesłom „Serbske sony a puće do přichoda“ je wčera wječor něhdźe 40 zajimcow do Němsko-serbskeho šulskeho kompleksa w Slepom přiwabiła. Zarjadowarjo běchu Wuwićowa towaršnosć delnjošleska Hornja Łužica (ENO), Projekt ZARI - syć za serbsku rěč a regionalnu identitu kaž tež projekt gmejnow Slepo, Trjebin a Dźěwin „SerbIT – Serbska inowacija a tradicija“. Jich zhromadny cil na tutym wječoru běše, z domoródnymi Slepjanskeje kónčiny za idejemi a pućemi pytać, kak móhli serbsku rěč a kulturu w regionje přisporjeć, ju widźomnišu sčinić. Nimo hosćićela – nawody Wyšeje šule Slepo Jana Hrjehora – běchu mjez druhim tež Slepjanski wjesnjanosta Jörg Funda (CDU), wjesnjanosta gmejny Dźěwin Sebastian­ Bertko (njestronjan), kaž tež serbski predikant z Rownoho Manfred Hermaš mjez wobdźělnikami.