Slepo (AK/SN). Za přesydleny Miłoraz płaći wotnětka wosebity fonds Wjesne wuwiće Miłoraz. Zakład je lěta 2019 podpisane zrěčenje mjez gmejnomaj Trjebin a Slepo kaž tež energijowym koncernom LEAG. Fonds płaći za přichodne 25 lět. Na posedźenju Slepjanskeje gmejnskeje rady wutoru směrnicy wobzamknychu. „Zaměr fondsa je wjesnu zhromadnosć skrućić“, praji wjesnjanosta Jörg Funda (CDU). Z fondsom chcedźa wjesny towarstwowy dom a mału kupjel wudźer­žować, wjesne zelenišća hladać, serbske nałožki a tradicije pěstować kaž tež so wo wojerski pomnik starać.