Na městnje bywšeho hosćenca multifunkcionalny areal nastał
Pančicy-Kukow (SN/MWj). Nowe wjesne srjedźišćo napřećo klóštrej Marijinej hwězdźe su wčera w Pančicach-Kukowje oficialnje přepodali. Hižo loni w oktobru běchu je dotwarili, z wčerawšim swjedźenjom smě so komunikaciska arena z hrajkanišćom a pawiljonomaj zjawnje wužiwać. Wopytowarjam je chór Šule Ćišinskeho pod nawodom Marije-Terezy Rychtarjoweje někotre serbske štučki zanjesł. Moderatorka Bogna Korjeńkowa witaše nimo zapósłanče Sakskeho krajneho sejma Elaine Jenčec a dalšich hosći wjesnjanostu Markusa Kreuza (wobaj CDU) a architekta Marka Dźisławka.
