Kulowc (aha/SN). Nimale wšitcy 200 wobydlerjo Kulowca a runje telko ludźi z Kulowa a wokolnych wsow je so njedźelu na wjesnym swjedźenju w Kulowcu zešło. Předsyda tamnišeho wjesneho kluba ­Gero Paška hódnoćeše, zo bě prawje, ­mejemjetanje z wjesnym swjedźenjom zwjazać. Wot 2015 wón wjesnemu klubej předsydari, kotremuž přisłuša 40 muži a dwě žonje. Wjesny klub je so wo to starał, zo maja z towarstwowym domom Archa zetkanišćo za wjesnu ludnosć a z tym centrum zhromadnosće w Kulowcu.

Zo pak so wjesny klub mjeztym tež hajenju serbskich nałožkow wěnuje, je zasłužba Serafiny Pašcyneje. Wona je so wo to starała, zo so holcy w serbskej katolskej narodnej drasće na mejemjetanju wobdźěla. Přewšo krasny bě to napohlad, jako 30 porow dźěći a młodostnych na swjedźenišćo zaćahny. Tónle wobraz w běhu popołdnja mnozy chwalachu.