Slepo (AK/SN). Serbsku rěč, kulturu a stawizny móža zajimcy w Slepjanskim regionje tež w awgusće dožiwić. Tole podšmórnje rěčna motiwatorka Juliana Kaulfürstowa. W aktualnym hamtskim łopjenu Slepjanskeho zarjadniskeho zjednoćenstwa skedźbnja wona na wustajeńcu „Płachta pełna hulicowańkow“ a na lětnje pućowanje.

Wustajeńca, kotraž wěnuje so Slepjanskej serbšćinje, je wot dźensnišeho hač do 31. awgusta w Slepjanskej cyrkwi widźeć. Wona dokumentuje žiwjenske stawizny wobydlerjow, kotřiž awtentisce Slepjansku serbšćinu rěča. W času wot 2010 hač do 2015 su we wšitkich wsach Slepjanskeho regiona z maćernorěčnymi Serbami a Serbowkami rěčeli a jich dopomnjenki jako zwukowe dokumenty natočili. Słyšeć su wone na dwěmaj CDjomaj. Runočasnje je fotowa wustajeńca nastała. Štwórtk, 21. awgusta w 17 hodź. móža so zajimcy na wodźenju po přehladce wobdźělić.