Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (62)

Štóž je hordy wobsedźer stadła kruwow, tón wě, zo njemóže bjez dorosta stadło rosć a so wuwiwać. Tuž je trjeba, zo so wěste abo samo wšitke žónske kruwy prjedy abo pozdźišo nošne stanu. To płaći w zawodźe z dejkami (Milchviehbetrieb) runje tak kaž na pastwje z družinami kruwow, kiž so kormja a hdźež ćelo z maćerju wotrosće (Mutterkuhhaltung).

Pola stadła so kormjaceho skotu dźě nadeńdźeš zwjetša na wěsty čas byka mjez kruwami. Dobry byk dokładnje začuwa, hdy so kruwa kóći (brünstig), a tak wopłodźi so zrała jejkowa bańka w optimalnym padźe přez přirodny skok. Hišće do Druheje swětoweje wójny bě tute wašnje wopłodźenja wšudźe z praksu. A štóž měješe jenož dwě kruwje, pósła jej we wotpowědnym času „na prózdniny“ do stadła susoda, kotryž měješe byka.