Jako bě kniha „Serbske pomniki“ awtorki Trudle Malinkoweje w aprylu 2019 runje wušła, zazwoni dr. Constantin Mamat na šulske wjednistwo Kulowskeje wyšeje šule. Wón so tehdy ze zawostajenstwom swojeho zemrěteho dźěda Heinza Mamata zaběraše. Při tym storči na informacije, kotrež potrjechja wyšu šulu w Kulowje. W knize Trudle Malinkoweje rěka: „Wo nastaću Kocoroweho pomnika na šulskim dworje a tworićelu bronzoweho reliefa njejsu nadrobniše informacije znate.“