Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (11)

Salowska wohnjowa wobora je poměrnje młoda. „Wona je hakle 1960 nastała. Nastork za nju je ze wsy přišoł“, powěda Jurij Szczepanski, kiž bě wot 1985 hač do 2018 nawoda wobory. Jeho nan Józef Szczepanski, Jurij Woko, Werner Hantke, Jurij Kral, Joachim Bulank, Jurij Lipič, Jan Šołta a dalši wobydlerjo běchu mjez prěnimi kameradami. „Wobornicy sami su tež prěnju gratownju twarili. Cyhelernja we wsy je jim material za to přewostajiła“, Jurij Szczepanski powěda. Dźensa su wot 180 wobydlerjow 37 dźěl wobory. 16lětna Mia Pröhlec je jenička žona. Hižo za čas NDR mějachu wohnjowobornu sportowu skupinu. Tuchwilu dwanaće kameradow kóždy tydźeń zwučuje. „Wobdźělamy so na mnohich wubědźowanjach a jězdźimy za to hač do Zella-Mehlisa w Durinskej“, praji 31lětny Michał Mróz. Wón Salowskich wobornikow wot lěta 2023 nawjeduje.