W Chrósćicach wo podzemskim slědźenju a wětrnikach diskutowali

Chrósćicy (JK/SN). Tajke temy ludźi zajimuja a tuž njezadźiwa, zo městna w sydarni „Łužica“ w gmejnskim a kulturnym centrumje w Chrósćicach wčera wječor njedosahachu.

Po tym zo bě gmejnska rada wo twarskimaj naležnosćomaj wuradźowała, so profesor dr. Günther Hasinger, wědomostny direktor Astrocentruma Łužica (DZA), słowa jimaše. Na zrozumliwe wašnje wón nazornje pozadk, zakłady a zaměry slědźenja wědomostnikow wokoło grawitaciskich žołmow předstaji, kotrež móhli nastaće swětnišća sobu wuswětlić a wuchadźišćo za slědźenje a zhotowjenje najwšelakorišich nastrojow a materialijow za industriju a hospodarstwo być. Za tajke slědźenje je absolutny měr trěbny a w zornowcu w serbskej Łužicy su dobre wuměnjenja za to. Astrocentrum pak ma hladajo na Einsteinowy teleskop konkurentow na kupje Sardiniska a w Nižozemskej.