Hamor (AK/SN). W bywšej Hamorskej plahowarni rybow chcedźa solarny park natwarić. Za to je so Hamorska gmejnska rada wuprajiła. Wjetšina radźićelow je na swojim zašłym posedźenju naćiskej twarskeho plana přihłosowała. Nětko jón zjawnje wupołoža.

Hižo w nowembru 2022 běchu woni přihłosowali, zo smě so plan nastajić. Dwě lěće pozdźišo móžachu wobydlerjo a zarjadnišća swoje měnjenje zapodać. Tehdy wuradźowachu hłownje wo tym, hač so tež wobswěto- a přirodoškitne ­naprawy dosć wobkedźbuja.

Na terenje bywšeje plahowarnje rybow chcedźa dohromady 13 000 foto­woltaikowych modulow natwarić. Wone maja wob lěto 7 500 megawattow miliny produkować. Jako wurunansku naprawu planuja mjez druhim sadowcowu łuku. Nimo toho chce předewzaće BKO nature power jako inwestor štomiki sadźeć a zazyglowane płoniny přirodźe wróćić. Kaž jednaćelka BKO Julia Schultze rozłoži, wottorhaja tež stare basenki. Při tym zdobyty material budu potom za dróho­twar wužiwać.