Budyšin (UM/SN). Sakska statna ministerka za kulturu Barbara Klepsch (CDU) je tydźenja srjedu bywše Budyske stasi-jastwo a dźensniše wopomnišćo wopytała, zo by tamnišej nawodnicy Silke Klewin zdźělenku wo spěchowanju wopomnišća z cyłkownej sumu 240 000 eurow přepodała. Wob lěto ma wopomnišćo něhdźe 90 000 wopytowarjow. Konkretne plany za wužiwanje financnych srědkow we wopomnišću hižo maja, tak zwurazni nawodnica. Garaže na dworje něhdyšeho stasi-jastwa Budyšin II chcedźa na centralny přijimowanski wobłuk přetwarić. „Dotal nimamy centralneho městna, na kotrymž móhli so wopytowarjo zhromadźić a na kotrymž hnydom spóznawaja: Tu je zastup do wopomnišća“, znazorni Silke Klewin. Mjez druhim změja wosrjedź noweho twara tež městna, na kotrychž móhli so šulske rjadownje na seminar abo přednošk schadźować. Tež serwisowy wobłuk budźe tu zaměstnjeny. Nowy zachod do wopomnišća zmóžni wopytowarjam bjezbarjerny přistup.