Kulow (AK/SN). Z měšćanskotwarskeho programa Swobodneho stata Sakskeje a Zwjazka móže město Kulow z dołhodobnym spěchowanjom ličić. Přizwolenske wopismo je měšćanosta Markus Posch (CDU) minjene dny přijimał. „Zo su naše město do programa přiwzali, je wulka šansa, zo za wobydlerjow wobraz města modernizujemy a infrastrukturu polěpšimy“, Posch wuzběhny. W času hač do lěta 2039 zaplanuja naprawy w cyłkownej hódnoće dwanaće milionow eurow. Z toho spěchuje štyri miliony eurow Sakska a runje telko Zwjazk. Dalše štyri miliony eurow zapłaći město Kulow jako swójski podźěl.

W měsće ponowja wjacore wěcy. Tak chcedźa wyšu šulu „Korla Awgust Kocor“ dale saněrować a třěchu małeje sportownje energetisce polěpšić. Tohorunja zaplanuja energetiske naprawy za wokna a fasadu pěstowarnje w nošerstwje Křesćansko-socialneho kubłanskeho skutka. Wonkowny teren kubłanišća chcedźa modernizować a nowe hrajkanišćo twarić. Dale ponowja ­Stare dwórnišćo z jeho žurlu a saněruja fasadu Křižneje cyrkwje energetisce.