Dobre žně so tež na nazymskich wikach w Slepom wotbłyšćowali
Slepo (JoS/SN). Lětuše njewšědnje bohate žně jabłukow, ale tež najwšelakoriše družiny tomatow stejachu w srjedźišću nazymskich wikow minjeny kónc tydźenja w Slepjanskim Serbskim kulturnym centrumje. Přichwatałoj běštaj tam Lubijski pomologa Klaus Schwartz a Drježdźanska zahrodniska fachowča Birgit Kempe. Wobaj na wjele prašenje zajimowanych wopytowarjow wotmołwještaj.
Klaus Schwartz rěčeše wo „super žnjach“ jabłukow, kotrež lětsa dožiwjamy. „Na štomach wisaja ekstremne mnóstwa jabłukow. Ludźo přemało žněja, ale wjace hač je jěsć tež nichtó njemóže.“ Po měnjenju Klausa Schwartza je předewšěm w Delnjej Łužicy přemało městnow, hdźež móžeš swoje jabłuka na přikład na brěčku předźěłać. Tam, hdźež to funguje, su často přežadani. W Hornim kraju je połoženje po měnjenju fachowca lěpše. Na swojej plantaži w Lubiju ma wón wjace hač 700 družin jabłukow. 300 z nich je wón do Slepoho sobu přiwjez. Mnozy wužichu składnosć a tak fachowc za nich zwěsći, kotre jabłuka na swójskej zahrodźe maja.
