Dźěłarnistwo namołwja Budysku měšćansku radu pěstowarnjow dla

Budyšin (SN/mb). Daniela Kocksch, zamołwita dźěłarnistwa ver.di za socialnu a kubłansku słužbu, a Daniel Herold, wobwodny jednaćel ver.di w Sakskej nimo Lipska, staj drje na politiske konflikty w komunach etata dla zwučenaj. Ale aktualna konfrontacija na čole zarjadnistwa sprjewineho města „přinošuje k znjeměrnjenju a wothódnoćenju při­stajenych Budyskich pěstowarnjow“, kritizujetaj w rozmołwje z našim wječornikom: „Wyši měšćanosta a financny měšćanosta staj načolnaj politikarjej. Wočakujemoj wot njeju, zo prašenja etata profesionalnje a nastupajo socialne naležnosće tež z empatiju rozjimataj a so njeza­šmjatataj w boju wo politisku móc.“