Pola Bronja nadźijeja so archeologojo nowych dopóznaćow

Bronjo (SN/BŠe). Sobudźěłaćerjo sakskeho krajneho zarjada za archeologiju a Přirodowědomostneje uniwersity Wrocław přepytuja tuchwilu zbytki hrodźišća pola Bronja. Serbske Nowiny mějachu wčera składnosć archeologam přihladować a sej postup přepytowanjow rozkłasć dać.

„Hrodźišćo ma mnoho potenciala, nastupajo móžne wuslědźenja“, zwurazni archeologa Florian Jordan. Z barbojtymi chorhojčkami su fachowcy dimensije hrodźišća woznamjenili. Tak bě wone přerěznje něhdźe 150 do 200 metrow šěroke. Hłownje wobsteješe z nasypa w formje kruha. Dokoławokoło bě hrjebja. Hrodźišćo bě 4,5 metrow wysoke a hrjebja něhdźe šěsć metrow šěroka a hač do jednoho metra hłuboka. Znutřka nasypa bě hrodźišćo přerěznje něhdźe 25 metrow šěroke. Z bywšich přepytowanjow wuchadźa, zo běchu wosrjedź hrodźišća tři twarjenja z drjewa.