Ralbicy. Za plahowarjow rasowych nuklow je stajnje wosebite dožiwjenje, hdyž smědźa so ze swojimi štyrinohatymi lubuškami na přehladkach najwšelakorišeho razu wobdźělić. Na tajkej přehladce jedne z prěnich městnow docpěć je wulki wuspěch. Nad tajkim wuznamjenjenjom je so krótko do hód Handrij Bulank w Ralbicach wjeselił, jako so na 37. cyłoněmskej přehladce rasowych nuklow w Karlsruhe wobdźěli a tam ze swojej družinu módrobarbnych nuklow z němskim mjenom „Deutsche Großsilber“ druhe městno wobsadźi.

50lětny nan štyrjoch dźěći dźěła powołansce w intensiwnym hladanju chorych ludźi. Hižo wot časa dźěćatstwa so wón za nukle zajimuje. Mjeztym přisłuša wón pjeć lět Njebjelčanskemu towarstwu plahowarjow rasowych nuklow. „Wot toho časa swój hobby zaměrnišo a profesionalnišo pěstuju“, Ralbičan powěda. Najprjedy plahowaše wón družinu němskich hobrow. Pozdźišo so za hinašej družinu rozhladowaše a so skónčnje za módrobarbne nukle rozsudźi. Wone so Handrijej Bulankej wosebje lubja. Tale rědka družina nuklow ma so zachować.