Brězowka (AK/SN). Fotowoltaikowy park mjez Dźěwinom a Brězowku bě jedna z temow, z kotrejž je so Dźěwinska gmejnska rada na swojim prěnim posedźenju w nowym lěće zaběrała. Inwestoraj a twarskej knjezaj stej firmje ToRa z Mužakowa a MET ze Šwicarskeje. Na 39 hektarach ma fotowoltaikowy park z wukonom hač do 67,2 megawattaj nastać. Wob lěto wočakuja wunošk we wobjimje 51 gigawattowych hodźin. Park přizamknu na 110 kilowoltow sylny milinowód, kiž tam w bliskosći nimo wjedźe. Do projekta ma so nimo toho baterijowy skład zapřijeć. Na te wašnje njebudu žane dołhe kable trěbne, tak zo hodźi so potencial parka połnje wučerpać, gmejna ­Dźěwin na swojej internetnej stronje zdźěla. Gmejna a wobsedźerjo ležownosćow předewzaće podpěruja.