Delanscy wobornicy hłownu zhromadźiznu z dobrej bilancu wotměli

Ralbicy (JK/SN). Swoju hłownu zhromadźiznu su wobornicy delanskeje gmejny minjenu sobotu w jědźerni Ralbičan­skeje šule přewjedli. K zahajenju witaše nawoda gmejnskeje wobory Michał ­Maywald nimo nimale sto aktiwnych čłonow gmejnskeje wohnjoweje wobory, wjesnjanostu Hubertusa Ryćerja (njestronjan) kaž tež nawodow wohnjowych woborow susodneju gmejnow Njeswačidło a Rakecy. Rakečanskim dźakowaše so za jich zwólniwosć, přewzać za kónc tydźenja za Ralbičanskich wobornikow hotowostnu słužbu a ewentualne zasadźenja.

Slědowachu rozprawy jednotliwych wjesnych woborow, kotrež jich nawodźa přednjesechu. Tak mjez druhim wobornicy Konjec-Šunowa dźakownje wo wobnowjenej gratowni kaž tež wo nowym tepjenju w njej rozprawjachu a so zdobom gmejnje za wulkotnu pomoc dźakowachu. Tež w Smjerdźacej maja wobornicy w rumnosćach něhdyšeje pěstowarnje nětko přijomne móžnosće, so na da­lekubłanja a zhromadźizny zetkawać. Rumnosće su w swójskej iniciatiwje sami wobnowili a sej zarjadowali.