Komuny rozmysluja, kak swój podźěl z wulkeho hornca pjenjez nałožować

Pančicy-Kukow (SN/MWj). Mały dźěl tak mjenowaneho wosebiteho zamóženstwa we wobjimje 100 miliardow eurow, kotrež chce němske knježerstwo za wutwar infrastruktury wudać, ma tež do jednotliwych komunow dóńć. Města a gmejny su tuž namołwjene rozmyslować, kak chcyli pjenjezy najzmysłapołnišo zasadźeć. Tole zdźěli wjesnjanosta gmejny Pančicy-Kukow Markus Kreuz (CDU) na zašłym posedźenju gmejnskeje rady. ­Do toho běchu wjesnjanosća a měšćanosća Budyskeho wokrjesa zhonili, kelko pjenjez budźe k dispoziciji, hdy móhli ­je komuny dóstać a kak měli je in­westować. 126 milionow eurow drje cyły Budyski wokrjes po tuchwilnym stawje infor­macijow z wulkeho hornca dóstanje. Něhdźe třećinu toho chce sej wo­krjes wobchować, zo móhł do swójskich projektow inwestować. Tamnej třećinje rozdźěla městam a gmejnam. Te maja hač do kónca apryla swoje ideje zapodać, za čo chcyli pjenjezy wudać. Po słowach Kreuza měła kóžda komuna znajmjeńša 250 000 eurow dóstać. Wuwzaće su tři ­jara małe gmejny, hdźež móhło to mjenje być.