Drježdźany (CRM/SN). W zarjadowanskim centrumje „Dom cyrkwje“ (HdK) Drježdźanskeje cyrkwje Třoch kralow wotewrěchu minjeny tydźeń pućowansku wustajeńcu „Widźomna mnohota – nabožiny w Sakskej“. Projekt bě w zhromadnym dźěle Sakskeje krajneje centrale za politiske kubłanje a jeje kooperaciskich partnerow nastał. Fakt dźě je, zo w Sakskej mjeztym jenož hišće mjenje hač 20 procentow wobydlerstwa ewangelskej abo katolskej cyrkwi přisłuša. Po politiskim přewróće pak zadomi so tež tu kopica nabožnych zjednoćenstwow, a to w dalokej měrje přez připućowarjow ze starych zwjazkowych krajow kaž tež z wukraja.

Na wosom dwójnych taflach portretuja so we wustajeńcy eritrejsko-prawosławna cyrkej w Drježdźanach, židowska wosada w Kamjenicy, zjednoćenstwo Ahmadiyya w Šwikawje, islamski kulturny centrum Bosnjakow w Lipsku, vietnamsko-buddhistiske towarstwo Gottleuba-Berggießhübel, hinduistiska zhromadnosć Indian Association w Drježdźanach, pólska katolska misija Drježdźany-Budyšin a Slepjanska ewangelska wosada.