Lejno. Konjace sportowe towarstwo Při Klóšterskej wodźe Pančicy-Kukow je póndźelu w Lejnjanskim Kubicec hosćencu swoju hłownu a wólbnu zhromadźiznu přewjedło. Předsydstwo rozprawješe wo wuspěšnym lěće 2025. K sportowym wjerškam słušeštej mjez druhim jěchanski turněr w Hórkach kaž tež wulět, kotryž je zhromadnosć w towarstwje zesylnił.
We wobłuku turnusowych wólbow je so cyłe předsydstwo znowa k wólbam stajiło a bu wot přitomnych čłonow jednohłósnje za dalše štyri lěta w zastojnstwje wobkrućene. Sandra Berndt wostanje z tym předsydka towarstwa.
Wosebje hnujacy wokomik wječora bě, jako pomjenowachu Mateja Korjeńka za čestneho čłona towarstwa. Jako jedyn ze załožerjow cyłka je Pančičan towarstwo sobu natwarił a w běhu lětdźesatkow z wurjadnym angažementom formował. Dźakowano jeho njesprócniwemu zasadźenju steji towarstwo dźensa na stabilnym fundamenće a je wuspěšne.
