We Łutach wotstronja 225 000 tonow wotpadkow cyłeje Hornjeje Łužicy

Łuty. Na mnohich městnach Hornjeje Łužicy wotměwa so w měrcu wosebita akcija zběranja wotpadkow při pućach, na naměstach a při pólnych šćežkach. To je dobra přičina, so raz za tym prašeć, što so z našimi wotpadkami scyła stanje, po tym zo smy je do wotpowědnych sudobjow tyknyli a wotpadkowe awto je je wotwjezło. Njeswačanska přirodoškitna stacija je tuž njedawno zajimcow přeprosyła, sej spalernju wotpadkow we Łutach wobhladać. Tam mjenujcy wšitko, štož do čorneje tony mjetamy, spala.