Tež wjedro je na tym wina, zo so twar kubłanišća dliji

Bart (UM/SN). Wotewrjenje Bartskeje wyšeje šule so wo poł lěta přestorči. Kaž ­Budyski krajnoradny zarjad zdźěli, pře­po­dadźa twar hakle lětsa w oktobru. Poprawom bě to hižo w februaru, potajkim po zymskich prózdninach předwidźane. Tónle termin bě prěni přirjadowany ­krajneho rady Jörg Szewczyk w oktobru 2023 při prěnim zarywje mjenował. ­„Poprawny časowy plan njeje so dodźeržeć hodźał, dokelž je so twarski wotběh dlił a dokelž je wjedro klubu činiło“, rěka z krajnoradneho zarjada wo přičinach aktualneho wuwića.

Z nowej wyšej šulu w Barće so šulska krajina Malešanskeje gmejny dospołnje změni. Dotalna wyša šula w Malešecach ma so na zakładnu šulu přetwarić. Tež tu so planowanje komdźi. Spočatnje bě předwidźane, dźěl kubłanišća zwottorhać a znowa natwarić. Tale warianta měješe najprjedy 11,5 mi­lionow eurow płaćić a je so mjeztym na 15,5 ­milionow eurow podróšiła. Předrohe, měni wjesnjanosta Matthias Seidel. Wón rozmysluje nětko tež wo móžnosći, dom dospołnje wottorhać a znowa natwarić.