Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (76)

Nimale wšitke cycaki njeporodźeja na kóncu nošnosće (Trächtigkeit) jenož młodźo, ale tež placentu (Mutterkuchen). Jeničce pola měchawcow (Beuteltiere), kaž stej to koala abo kenguru, je to hinak. Tam zalěze móličke młodźo do měcha maćerneho zwěrjeća, hdźež so zežiwja, doniž njeje „zrałe za swět“. Placenta je wony organ, kotryž zwjazuje maćerne ćěło z ćěłom njenarodźeneho młodźatka w maćernicy (Gebärmutter) za čas nošnosće. Dodawa wutki z kreje maćerneho zwěrjeća do ćěła młodźeća a transpor­tuje nawopak tež wotpadkowe maćizny z młodźeća do wobtoka maćerje.

Nimo toho škita placenta płód před mechaniskimi škodami, na př.: před dyrom wo brjuch maćerneho zwěrjeća. Tež wo produkciju wšelkich hormonow so placenta stara. Nic naposledk wotdźeržuje wona wiry a bakterije, zo njebychu wuwiće płoda negatiwnje wobwliwowali.