Šćeńca (AK/SN). Ratarski zawod „Při Dubowej horje“ w Šćeńcy, wjesnym dźělu Łazowskeje gmejny, ma w přichodźe tamnišu pěstowarnju a wjesny towarstwowy dom z ćopłotu zastarować. Tole su gmejnscy radźićeljo na swojim zašłym posedźenju wobzamknyli. Komunalne twarjenje, w kotrymž stej pěstowarnja a towarstwowy dom zaměstnjenej, dóstanje wot 1. oktobra ćopłotu z tepjernje, kotraž z drjewowymi třěskami dźěła.

Hižo wot lěta 2023 zastaruje ratarski zawod gmejnskej bydlenskej domaj w Šćeńcy z ćopłotu. W jednym je dwanaće bydlenjow, za kotrež dodawaja 50 kilowattowych hodźin, tamny dom ze štyrjomi bydlenjemi trjeba 20 kilowattowych hodźin. „Naše dotalne nazhonjenja su pozitiwne“, praji jednaćel agrarneho zawoda Lukas Beukelmann. „Smy tepjenske časy a mnóstwo ćopłoty přećam ­wobydlerjow přiměrili.“ Z pěstowarnju a towarstwowym domom přizamknu nětko dalšeju woteběrarjow. Štyri jednoswójbne domy blisko pěstowarnje móhli hišće slědować.