Pančicy-Kukow (SN/MWj). Dobrej ty­dźenjej do jutrow pytaja gmejny we wobłuku zarjadniskeho zwjazka Při Klóšterskej wodźe hišće pomocnikow, kotřiž ­bychu jutrowničku na serbskich wsach sobu nadróžny wobchad rjadowali. Na to skedźbni předsyda zarjadniskeho zwjazka Stefan Anders wutoru na posedźenju zastupjerjow sobustawskich gmejnow zwjazka w Pančicach-Kukowje. Po jeho słowach je lěto wob lěto ćežko, dosć pomocnikow namakać. To pak je wot gmejny ke gmejnje rozdźělne. „Lětsa je połoženje w Chrósćicach trochu napjećiše. Tam su tule słužbu stajnje wohnjowi ­wobornicy wukonjeli. Woni pak hižo wjacore lěta signalizowachu, zo chcedźa nadawk wotedać, a někotři su to lětsa ­činili“, praji Stefan Anders.