W Budyskej hwězdarni přihotuja dźeń astronomije

Budyšin (UM/SN). Štóž chce zaso raz Budysku hwězdarnju wopytać, změje k tomu bórze dobru składnosć. Sobotu, 28. měrca, přeprošuje towarstwo „ad astra“ wot 17 do 23 hodź. na dźeń astronomije. Při tym móža wopytowarjo mjez druhim zhonić, čehodla ma měsačk druhdy złote wuško a kak móžeš planetaj Wenušu a Jupiter najlěpje wobkedźbować. Na dnju astronomije towarstwo zdobom swoju nowu MINT-dźěłarnju předstaji. Z njej chcedźa młodym ludźom přirodowědne wobłuki zbližić. „Spočatk februara smy za dźěłarnju nowe meble dóstali. Naš zaměr je, kubłanske poskitki hwězdarnje rozšěrić“, praji předsyda towarstwa „ad astra“ Volker Bartko. Krok po kroku chcedźa skupinu młodych ludźi zdobyć, kotřiž astronomiske nastroje twarja, so z přirodowědnymi temami zaběraja a sej rjemjeslniske kmanosće přiswoja, Bartko rozłoži.