Wšelke generacije wo generaciji Ž debatowali

Při Serbskej debaće tydźenja srjedu njejsu jenož moderatorojo na konopeju wažnu rólu hrali, ale tež publikum. Něhdźe 30 hosći bě do Budyskeho dźěłanišća „Dźěłań dźeń“ přichwatało, zo bychu wo temje „Generacija Ž – hinaše žiwjenje, hinaša lubosć?“ diskutowali – abo diskusiji připosłuchali. Přetož byrnjež sej zarjadowarjo čiłu wuměnu wuraznje přeli, wosta w stwičce najprjedy skerje měrne.

Štóž nochcyše so direktnje přizjewić, móžeše swoje prašenja anonymnje na digitalnej sćěnowinje wotbyć. Tutu móžnosć hosćo předewšěm na kóncu wužiwachu, tak zo so diskusija přiběrajcy rozwi a bu w běhu debaty zmužićiša a čiliša.

Zo bu wjele temow jenož narěznjenych, nadpadny tež publikumej. „Runje wobłuk generacije Ž je jara šěroki“, praji wopytowarka Sofija Brězanec. Wona by sej přała, zo so jednotliwe aspekty, předewšěm nastupajo queernosć abo tematiku jutrow – konkretnje diskusiju wo žonach na konju – hišće dokładnišo wobjednawaja.