Twarnišćo na zwjazkowej dróze B 156 stara so wo paradoksne połoženje

Brězynka (UM/SN). Wot apryla 2024 wobydlerjo Brězynki (Briesing) w Malešanskej gmejnje wo to wojuja, zo přińdu wjesne dźěći wěsće na busowe zastanišćo. Wot toho časa mjenujcy dyrbja wone poprawom zwjazkowu dróhu B 156 z jeje wjele wobchadom přeprěčić, zo móhli do šulskeho busa zalězć. Do toho bě so bus blisko přijězda do wsy zawróćił, tak zo njetrjebachu dźěći přez puć. Po jutrownych prózdninach 2024 pak tole hižo móžno njebě, pječa wěstoty wobchada dla. Na to mjez druhim namjetowachu, zo móhł bus koło po Brězynce jěć, prjedy hač do směra na Delnju Hórku dale jědźe. „Nam pak stajnje rjeknychu, zo to móžno njeje“, rozprawja Heiko Kasper, kiž słuša w Brězynce k staršim, kotrychž dźěći su w šulskej starobje. Runje to pak so nětko wšědny dźeń stawa. Wot toho časa, zo w susodnym Čelchowje (Zschillichau) B 156 wutwarja, jědźe bus koło po Brězynce. Blisko B 156 su samo nachwilne zastanišćo natwarili.