Budyšin (SN/CS). Po ćichim pjatku knježeše w Budyšinje předewšěm ćichu sobotu a wězo jutrowničku čiłe žiwjenje. Tysacy wopytowarjow běchu zaso w měsće, zo bychu mnohostronske wjerški dožiwili. Sobotu wabjachu předewšěm wiki na Hłownym torhošću a Žitnych wikach z jutrownymi poskitkami. Młode Serbowki, šulerki Serbskeho gymnazija, skedźbnichu na kulturne zarjadowanja předewšěm w Serbskim ludowym ansamblu. Štóž njeje hišće wo tradiciji křižerskich procesionow ničo słyšał abo je dožiwił, je wot Bjarnata Cyža w Serbskej kulturnej informaciji (SKI) wo tym zhonił. Wón bě 49 lět z křižerjom a je hač do lěta 2019 w Baćońskim procesionje sobu jěchał. W SKI wotmě so zdobom kurs debjenja jejkow, kiž dobry wothłós žněješe. Wječor podachu so stotki ludźi k Hrodźišku, hdźež dožiwichu jutrowne trubjenje.