Spočatk nalěća so čas klěšćow zahaji. Strach strašnych infekciskich chorosćow pak njehrozy klěšćow dla jenož čłowjekej. Tež psy móža po kusnjenju klěšća chutnje schorić, mjenujcy na babesiozu, kotraž w ludźe tež psyča malarija rěka. Ličba potrjechenych psow lěto wob lěto stupa.
Zły Komorow/Kamjenc (SN/hn). Dokelž je lětsa wosebje wjele padow na babesiozu schorjenych psow, su zamołwići wokrjesa Hornje Błóta-Łužica spočatk minjeneho tydźenja zdźělenku wozjewili, w kotrejž mějićelow psow warnuja. Hižo ručež je pjeć stopjenkow celsiusa, klěšće wotuća a w trawje na swój wopor łakaja. Infekcija z babesiozu ma zwjetša smjertny wukónc, jeli ju skótny lěkar sčasom njespóznaje. Eksperća radźa mějićelam psow, zo swoje zwěrjo po kóždym wuchodźowanju dokładnje na klěšće přehladaja.
