ST Zeleno-běli Sepicy – ST 1922 Radwor 3:2 (0:0)

Zestawa hosći: Šěrak – B. Grubert, M. Grubert, Schäfer, Wjesela (73. Mička), ­Paška, Wencl (66. J. Pěčak), Adam, Hetaš, Glücklich, Dźisławk (86. Dej)

 W Sepicach mějachu Radworčenjo a Sepičenjo dobre wonkowne wuměnjenja. Při rjanym wjedrje a na wulkotnym hrajnišću bě lědma wurěčow. Třělwa běžeše čisće a wobě mustwje móžeštej swoju hru hrać. Radworčenjo startowachu sylnje do partije a přewzachu zahe kontrolu nad hru. Často woni bul wobsedźachu a dachu jón wěsće přez swójske rynki běžeć. Z tym postajowachu hrajne podawki. Hižo w prěnich mjeńšinach skićeše so prěnja wulka šansa. Marvin Paška přińdźe swobodnje k wotzamknjenju, wrota pak jenož snadnje misny. Po tym wu­hrachu sej hosćo dalšej wulkotnej móžnosći, njezamóchu pak jej wužić. Hosćićeljo łakachu mjeztym na kontery a buchu při tym přeco zaso strašni. Přiwšěm Radworska defensiwa kedźbowaše a móžeše mnoho situacijow sčasom wujasnić. We wrotach přeswědči Christoph Šěrak z porjadnym wukonom a dźeržeše swój team derje w hrě. Najebać jasne pólne lěpšiny pak dźěše bjez wrotow do přestawki.