Worklecy (SN/jp). Kónc tydźenja je zaso tójšto mejow we łužiskich wsach padnyło. Tak tež we Worklecach na kupje wosrjedź wsy. Hižo sobotu běše so wjesna młodźina zetkała, zo by kupu za mejemjetanje spřihotowała. Lětsa smědźachu zaso předawansku budku wjesneje zhromadnosće za předawanje napojow wužiwać. Młodostni přistajichu hišće swójski swjedźenski stan, zo bychu tež jědź pod suchim předawać móhli.
Wčera popołdnju so Worklečanska młodźina při młodźinskim klubje z dźěćimi wsy zeńdźe, zo bychu wottam zhromadnje na swjedźenišćo ćahnyli. Hižo w třoch zetkachu so wobydlerjo a wobydlerki kaž tež hosćo na kofej a tykanc. Hodźinu pozdźišo zaćahny 34 porow w starobje mjez šěsć a 19 lětami na kupu. Woni zarejowachu Šewca a Katyržinku a dalše standardne reje. Po tym zo běchu so dźěći z kruha rejowarjow wotsalili, předstajichu čłonojo młodźinskeho kluba k spěwej „Kołoběh časow“ z pjera skupiny JANKAHANKA reju, kotruž běchu w běhu dweju tydźenjow sami nazwučowali. Publikum jich prócu z mócnym přikleskom mytowaše.
