Radźićeljo ze škodu w Chróšćanskej pěstowarni so zaběrali

Chrósćicy (JK/SN). Puknjeny wodowód je w Chróšćanskej pěstowarni „Chróšćan kołć“ wulku škodu w špundowanju a sćěnach zawinił. Po dokładnym pruwowanju je jasne, zo ma so špundowanje ­zwutorhać a sćěny wusušić. Wudawki za wotstronjenje škody a za z tym zwisowace dźěła přewozmje zawěsćernja. Wona je gmejnje fachowy inženjerski běrow doporučiła, kotryž móhł dźěła planować a w času twarskich naprawow přewodźeć. Runje tak je zawěsćernja fachowu firmu za zwutorhanje špundowanja a za wobšěrne sušenje namjetowała. Za tute dźěła, kotrež maja so kónc julija zahajić, su gmejnscy radźićeljo na swojim wčerawšim posedźenju wotpowědnej nadawkaj přepodali.