Koncerty chóra Lipa słušeja do wusahowacych wjerškow kulturneho žiwjenja w Pančicach-Kukowje. Wčera dyrbjachu jón připowědźenych dešćow dla znowa do bróžnje w Klóštrje přepołožić. Bróžnja bě kopaće połna a z hnujacymi słowami so wopytowarjo Lipjanam, małym Lipkam a žónskemu chórej z Lubina za wuběrny koncert dźakowachu.

Pančicy-Kukow. Klóšterska bróžnja wša brinčeše a ržeše, jako sej po dobrej połdra hodźinje hudźbnej cyłkaj zhromadnje z publikumom „Wjesele dźensa“ zaspěwaštej. Ze sylzami we wočach akterow a připosłucharjow a z mócnym přikleskowanjom so přewšo rjane hudźbne popołdnjo zakónči.

Domjacy chór Lipa ze swojej dirigentku Jadwigu Kaulfürstowej bě swój ­tradicionelny nalětni koncert z pěsnjomaj „Słyšiš rěčkow pluskotanje“ a „Nutř zwonja młode nalěćo“ z přewšo woblubowaneho oratorija „Nalěćo“ zahajił. ­Slědowaše medley z dalšimi spěwami oratorija, w kotrymž 13 solistow publikum zahori. Zaklinčachu pěsnje kaž „Pój, witaj nalěćo“, „Ha hdźe maće tu hadlenu“ a „Z dychom swjatoh Jana“. Na klawěrje přewodźeše Lipjanow Jan Brězan-­Hej­duška.