Minjene měsacy je w Rakečanskim wjesnym dźělu Stróža nowa gratownja dobrowólneje wohnjoweje wobory nastawała. Z njej změja wobornicy nětko wjele lěpše wuměnjenja hač dotal.
Stróža (UM/SN). Nahladne, z dweju dźělow wobstajace płone twarjenje je minjene měsacy w Stróži w Rakečanskej gmejnje nastawało. Je to nowa gratownja dobrowólneje wohnjoweje wobory w najsewjernišej wsy Rakečanskeje gmejny. Wjesnjanosta Swen Nowotny (CDU) rozłoži, čehodla bě tale inwesticija trěbna: „W swojej dotalnej gratowni dyrbjachu wohnjowi wobornicy pod jara wuskimi rumnostnymi wuměnjenjemi dźěłać. Jězdźidło steješe direktnje při kamorach za předrasćenje. To wězo žane dobre wuměnjenja njejsu, hdyž dyrbiš so na zasadźenje přihotować.“ Spočatnje chcychu wobstejacu gratownju ponowić. Tale warianta pak njeskićeše žanu móžnosć, twarjenje rozšěrić. Tuž so gmejnska rada za nowotwar na Hrodowskim puću w bjezposrědnjej bliskosći k zwjazkowej dróze B 96 a k młodźinskemu klubej rozsudźi.
