Z hojenskej rostlinu lěta zaběra so stajnje spočatk junija fachowy sympozij w klóštrje Marijina hwězda Předwčerawšim su tam hojenskej rostlinje lěta 2026 a 2027 předstajili.
Pančicy-Kukow (SN/MWj). „Rěpnica – rjanosć, delikatesa a hojenska rostlina“ rěkaše wutoru na čerwjenej žurli klóštra Marijina hwězda w Pančicach-Kukowje hesło lětušeho fachoweho sympozija wo hojenskich zelach. Zarjadowanje přiwabi wjace hač 80 zajimcow. Na nje přeprosyłoj běštej Sakski krajny kuratorij za wjesnu kónčinu a towarstwo NHV Theophrastus.
W srjedźišću steješe rěpnica (Gemeine Nachtkerze, Oenothera biennis), kotraž je hojenska rostlina lěta 2026. „Z napadnje žołtej barbu kćějaca rostlina je w zahrodach runje tak rozšěrjena kaž na kromach pućow a na najwšelakorišich skłoninach“, zdźěli nowinska rěčnica kuratorija Uta Große. Charakteristiske je, zo so jeje kćenja we wječornych hodźinach wočinja, štož je jej jeje mjeno spožčiło.
