Spale (AK/SN). Z „Lubku liliju“ a dalšimi serbskimi ludowymi pěsnjemi witaše spěwna skupina Přezpólni njedźelu připołdnju dźewjeć konjacych zapřahow před Spalowskim hosćencom. Cyle prědku jědźeše Rakečanska dujerska kapała sobu. Na tamnych zapřahach sedźachu wobdźělnicy 20. serbskeho ewangelskeho domizniskeho dnja, kotřiž přijědźechu wot Božeje słužby we Wojerowskej Janskej cyrkwi.

Spale běchu wčera po lěće 2011 znowa z hosćićelom domizniskeho dnja, na kotrymž předewšěm wjesna młodźina sobu pomhaše. Za tónle dźeń běchu zelenu pletwu ze serbskim napisom „Witajće k nam“ nawili a nad zachodom hosćenca připrawili. Hosći posłužowachu holcy w serbskej drasće. „Smy hižo před lětomaj w Čornym Chołmcu pomhali, lětsa so znowa wobdźělimy. Činimy to za serbsku tradiciju a za wjesnu zhromadnosć“, praji Vanessa Markec ze Spalowskeho młodźinskeho kluba. Wona a jeje přećelki a přećeljo nošachu serbsku kwasnu poliwku kaž tež chrěn a howjaze mjaso na žurlu. „W Spalach je so wjele serbskeje tradicije zhubiło“, młodostna znazorni. „Štož je móžno, spytamy zachować.“