Budyšin (CS/SN). Tworjacy wuměłc Eberhard Peters swjeći 7. julija swoje 90. narodniny. Tutomu jubilejej wěnuje so aktualna wustajeńca „Zelene a čorne – Kelko čłowjek trjeba?“ w galeriji Budissin. W přitomnosći wuměłca bu přehladka minjeny pjatk wotewrjena. Kuratorka Tanja­ Böhme rjekny, zo „wuznamjenja wuměłca předewšěm mócna a młoda wobrazowa rěč“. A woprawdźe, njeby-li wědźał, zo je Peters tři wulke swětowe přewróty sobu dožiwił, by lědma wěrił, zo je so tworićel wustajenych twórbow hižo 1936 narodźił. W swojej lawdaciji rjekny Angela Paulke wo swojim nanje, zo chce „swoje mysle a začuća druhim zdźěleć a prašenja stajeć, bjez toho zo by wotmołwy podawał. Chce wobhladowarjam nastork dawać, wo žiwjenju rozmyslować.“ Po tym zo bě so na wuměnk podał, bě nastupajo wobrazowe wuhotowanje kaž wuswobodźeny. Móžnosć pućować je jeho horiconty přestorčiła a wolu zbudźiła, sej nowe dohlady wotkryć a zdobyć. Tak zdalowaše so wot předmjetneho wobrazoweho tworjenja a přibliži so abstraktnemu. Tež asemblaže w tutym času nastachu. Wustajeńca pak pokazuje zdobom wobrazy prjedawšich fazow tworjenja.