Wo planach Zwjazkoweje wobory za Njedźichow diskutowali

Lejno (SN/jp). Pod hesłom „Łužica – wot brunicoweho rewěra ke křižnišću za zakitowanje“ bě zapósłanča Sakskeho krajneho sejma Elaine Jenčec (CDU) za podijowu diskusiju wabiła, kotraž so wčera wječor w Lejnje wotmě. Wjesnjanosta gmejny Chrósćicy Marko Kliman (CDU) diskusijny wječor zahaji, předstajiwši wobdźělnikow, kiž běchu so za to přizjewili. K nim słušeštaj zapósłanc zwjazkoweho sejma Jens Lehmann (CDU) kaž tež předsyda Srjedźoněmskeho instituta za wěstotnu industriju, generalny major n.w. Markus Kurczyk. Tež Njedźichowski měšćanosta Harry Habel (CDU) so na diskusiji wobdźěli. Ćežišćo wječora bě dźě zaměstnjenje bataljona Zwjazkoweje wobory za logistiku w Njedźichowje. Lehmann a Kurczyk podaštaj w inicialnymaj přednoškomaj zawod do tematiki.