Zaměr je zhonić, što sej Serbja digitalnje w přichodźe přeja

Budyšin (SN/MiR). Lětdźesatki mjeztym w Serbach wo tym rěčimy, zo nimamy platformu informacijow. Wězo mamy mjeztym cyłu kopicu internetnych poskitkow. Serbske institucije a zarjadnišća w syći swoje zamóžnosće a poskitki šěrja. Tež zwonka zarjadniskeho žiwjenja tajkich stronow je, hač wo towarstwach, gmejnach, wuměłcach abo jednotliwych akcijach – Serbja su w mjezynarodnej syći zastupjene. To pak Benej Brězanej z Budyskeho studija Lausitz.Rocks! njedosaha. „Mi pobrachuje platforma, kotraž wšitke informacije na jednej stronje wjaza. Trjebamy stronu, z kotrejež so zajimcy na wšitke poskitki dóstanu, kotrež Serbow w syći prezentuja.“ Tola kotre poskitki a funkcije dotal pobrachuja? Jemu je wažne, zo so přeća a ideje Serbow kaž tež ludźi z tu- a wukraja, kotřiž so z Łužicu zaběraja, wotbłyšćuja. „Chcu, zo nastanje centralny kanal z informacijemi wo serbskej Łužicy. Wšitcy zajimcy móža do kanala swoje informacije podawać a my chcemy je šěrić“, wón praji a měni team, kotryž chce wutworić.