Wokrjesny sejmik posledni raz do lěćneje přestawki wuradźował

Budyšin. (SN/jp). Sobustawojo dźěłarnistwa Verdi – hłownje přistajeni zjawneho bliskowobchada – su wčera popołdnju před krajnoradnym zarjadom w Budyšinje na swoje starosće skedźbnili. We wěstotnych lacach, z transparentami w rukomaj a hwižkami w hubje su w zjawnosći kedźbnosć zbudźili. Pozadk protestow je, zo je wokrjesny sejmik na swojim wurjadnym posedźenju kónc meje lutowanske naprawy w bliskowobchadźe wobzamknył. Ze zalutowanymi pjenjezami ma so porodźernja Kamjenskeje chorownje swj. Jana financielnje podpěrać. Cyłkownje jedna so wo 500 000 eurow.