Němcy (KD/SN). We wobłuku 28. cyłoněmskeho wubědźowanja „Naša wjes ma přichod“ je jury minjeny pjatk Němcy wopytała. W běhu třoch hodźin prezentowaše něhdźe sto wobydlerjow swoje towarstwa, zarjadnišća a wjacore firmy, kotrež wjesne žiwjenje cyłe lěto sobu wobohaćeja. Hornjołužiska wjes bě so z druhim městnom w sakskim krajnym wubědźowanju za zwjazkowe finale kwalifikowała a so nětko ze swojeje najlěpšeje strony předstaji.
Při wětrniku dźěći Witaj-pěstowarnje „Pumpot“ čłonow jury w serbskej drasće z chlěbom a selu witachu. Program holcow a hólcow znazornješe, zo jim w pěstowarni serbsku rěč a tradicije dale sposrědkuja. Mónika Neubertowa porěča wo dźěle towarstwa seniorow. Jeho čłonojo mjez druhim pomhaja, holcy za ptači kwas abo mejemjetanje serbsku drastu woblěkać. Za tónle nadawk chce Denise Schreiber z młodźinskeho kluba rady tež swójskich čłonow zdobyć. Runje na dnju wopyta jury je Němčanska młodźina tohorunja wječorne wjesne reje wuhotowała. Při tym pomhaše nimo wohnjoweje wobory tež wjesny klub, kaž Daniel Kummer rozprawješe.
