Towarstwo za wuwiwanje Hornjołu­žiskeje hole a hatow (OHTL) spěchuje z wosebitym programom projekty, z kotrymiž so zadźěwki w zjawnym žiwjenju­ wotstronjeja. Mjez dobyćerjemi lětušeho wubědźowanja je Wotrowska wosada.

Wotrow (SN/jp). Hižo wot spočatka junija maja na Wotrowskim kěrchowje twarnišćo. Tam ponowjeja šćežki na kěrchowje, dokelž njejsu hižo rune dosć. W běhu lětdźesatkow běchu kamjentne platy pućika wšitkim wjedram wustajene. Tak nastachu lute mjeńše a wjetše schodźenki, tak zo mějachu ludźo z jězbnym stołom abo rolatorom dźeń a wjetše ćeže, so po kěrchowje pohibować. Tuž je wosadna rada rozsudźiła, zo ponowja zachod do ćěłownje a pućik při muri podłu Cyrkwinskeje dróhi. Z přetwarom maja předewšěm ludźo z handicapom a starši ludźo lěpši přistup k ćěłowni dóstać.

Twarski zawod Haidan a Richter, kiž je za twarske dźěła zamołwity, ma tři schodźenki před ćěłownju wotstronić a přistup z rampu tak přetwarić, zo je tež ludźom­ z jězbnym stołom a rolatorom přistup móžny.