Nowe stejnišćo za směrodajne kooperacije w Budyšinje wotewrěli

Budyšin. (SN/jp). Na Dźiwadłowej hasy w Budyšinje, woblubowanym puću pěškow wot Lawskich hrjebjow na Bohatu hasu, bě něhdy wobchod za sad a zeleninu, kotryž pak je dawno zawrjeny. Město Budyšin je rumnosć kupiło a tam nowu „denkBar“ zarjadowało. Što za mjenom tči, su wčera na swjatočnym wotewrjenju w domje na róžku Dźiwadłoweje/Kotołskeje hasy zjawnosći předstajili. Tule ma mjez druhim městno za zhromadne dźěło wšelakich komunow, ale tež za rozjimanje prašenjow hospodarskeho wuwića być. Hłowny zaměr je kooperacije zmóžnić a ideje hromadu zwjesć. K tomu ma w přichodźe tež běrow Techniskeje uniwersity Drježdźany słušeć, hdźež chcedźa zhromadnje z wobydlerjemi kaž tež studentami a profesorami nowe ideje za recycling twarskich maćiznow wudźěłać.