38. wječorne spěwanje pod měrowym dubom je w Židźinom srjedu něhdźe 300 wopytowarjow přiwabiło. Tam swjećachu 40lětne wobstaće Chóra Židźino, 155 lět měrowy dub a 625. róčnicu wsy.

Židźino (AK/SN). W Židźinom bije serbska wutroba. Hnydom dwójce zaklinča srjedu pod měrowym dubom „Lubka lilija­“. Muski chór Delany z dirigentom Matejom Kowarjom je hnydom na spočatku hosći z tutej pěsnju zawjeselił. Hosćićelski­ Chór Židźino pod nawodom Pětra Cyža pak zaspěwa jón nimale na kóncu za swojeho lětsa zemrěteho čłona Helmuta Köhlera. „To bě jeho najlubši spěw“, rjekny přewodźerka Weronika Boswankowa­. Marta Zahrodnikec zahaji zarjadowanje na dudach.