Tójšto spokojnych wopytowarjow na Sernjanskim wjesnym swjedźenju

Sernjany. Wulkotne wjedro, wurjadny swjedźeń a jenož zbožowne mjezwoča wot najmłódšich hač k najstaršim wopytowarjam – takle móžeš lětuši wjesny swjedźeń w Sernjanach zjimać. Tam wšak dźiwaja stajnje na to, zo so wulět do małeje delanskeje wsy za kóždu generaciju wudani. Pjatk wječor zahajichu swjedźeń z wubědźowanjom wohnjowych woborow, kotrež dobychu domjacy kameradojo. Wječor wjerćeše potom DJ Romano Meinert swoje tačele – rejowanišćo běše stajnje połne. Tak bě to wuběrny start do kónca tydźenja.

Sobotu po připołdnju přewjedźechu w małej arenje koparski turněr ze sydom mustwami, kotryž Róžeńčenjo dobychu. Popołdnju sydaše kofej a tykanc. Jón wopytachu přewažnje wuměnkarjo tak mjenowaneho Meli-zetkanja. Tute zetkanja stajnje zaso w Sernjanach organizuja. Wječor postara so DJ Ronny wo měšanu hudźbu we wulkim stanje. W techno-róžku mějachu lubowarjo wótreje basoweje hudźby tohorunja wulke wjeselo. Wjacore sta ludźi wječor w Sernjanach zličichu.