Radwor. Kajki bě to wulki hołk a tołk minjeny kónc tydźenja w Radworju! Pjaty barowy festiwal młodźinskeho kluba je tójšto wopytowarjow přiwabił. Tydźenje dołho su čłonojo kluba swjedźeń přihotowali. Wuslědk bě wotměnjawy program za wšitke generacije.

Zazběh bě pjatk wječor z powitanjom a tradicionalnym natočenjom piwa. Po tym su woblubowany korčmowy kwis přewjedli. Něhdźe 250 wopytowarjow wobdźěli so na prěnim swjedźenskim wječoru. Kwisowe skupiny dyrbjachu na prašenja ze wšelakich temowych wobłukow wotmołwić. Wuhódać dyrbjachu mjez druhim znatych dźiwadźelnikow, spěwy abo zapřijeće z pomocu wobrazow po principje „Štyri wobrazy – jedne słowo“. Za čas wubědźowanja su wobdźělnicy wjele diskutowali a přemyslowali – hłowy so potajkim kurjachu. Na kóncu doby mustwo „Na wopyće“ z Danicu Hickec, Lindu, Lydiju a Marlene Matikec, kaž tež Linu Hannig. Po tym postara so DJ „Systhemfehler“ wo dobru naladu na rejowanišću. Hač do pózdnjeje nocy Radworčenjo a hosćo z wokoliny zhromadnje swjećachu.