Za Neele Selmu Rachelic je nawuknjenje serbskeje rěče wjele wjace hač wučba a wokable. 20lětna z Třoch Žonow chce dźěl swojich swójbnych stawiznow wožiwić a sej rěč znowa wotkryć, kotraž słuša kruće k jeje swójbnym korjenjam.
Korjenje jeje swójby leža w kónčinje wokoło Rakec. Z maćerneho kaž tež z boka nana pochadźeja jich prjedownicy ze serbskich swójbow. W běhu generacijow pak je so rěč ze wšědneho dnja w dalokej měrje pozhubiła. Jenož jeje dźěd Günther Holder hišće aktiwnje serbuje. Wón bě wjele lět w Serbskim ewangelskim towarstwje (SET) kaž tež zdźěla w Domowinje aktiwny. Dźensa je za swoju wnučku najwažniši rěčny partner. Zhromadnje z nim zwučuje Neele prawidłownje rěčeć – přidatnje k wučbje w Domoj-kursu projekta ZARI. „Chcu serbsce rozumić a sama rěčeć móc“, wona powěda. Předewšěm chce so ze swojim dźědom w jeho maćeršćinje rozmołwjeć a rěč cyle samozrozumliwje nałožować. Zhromadne wuknjenje a nałožowanje rěče jeju hižo dźensa na wosebite wašnje zwjazuje a dźěl swójbneje tradicije zaso wožiwja.
